FEVASek ia ehun pertsona bildu zituen azaroaren 20an Kursaalean, “Musika inklusiorako tresna gisa” jardunaldian. Ekimen horren helburua musikaren balioaz sentsibilizatzea izan zen, adimen-desgaitasuna, garuneko paralisia eta autismoaren espektroko nahasmenduak dituzten pertsonen eskubideak bermatzeko eta haien hezkuntza eta gizarte inklusioa bultzatzeko.
Jardunaldia Aitor Arambarri, Jon Costa, Aitor Echaniz, Arkaitz Fabian, Irati Gómez, Ion Intxauspe, Imanol Timón eta Lionel Axel Vargasen musika emanaldiarekin hasi zen. Bertan Simon Ezquiagak “Aniztasun erlatiboa” interpretatu zuen. Musika proposamena Yamel Romero musikari eta Musikanaiz Zentroko zuzendariak koordinatu zuen.
Ondoren, inaugurazioa egin zen, Josean Idoeta FEVASeko presidentearen parte hartzearekin, eta nabarmendu zuenez, “funtsezkoa da desgaitasuna duten haurrek musika ikasteko eta beren talentu artistikoa garatzeko aukera eta laguntzak izatea”. Bestalde, Roberto Ugarte Euskadiko Orkestrako zuzendari nagusiak Euskadiko Orkestrak duela 15 urte baino gehiagotik FEVASekin lankidetzan gauzatzen dituen jardueren balioa azpimarratu zuen. Azkenik, Begoña Pedrosa Hezkuntza sailburuak FEVASekin eta familiekin batera lan egitearen garrantzia azpimarratu zuen, inklusioan aurrera egiten jarraitzeko.
Irekiera ekitaldiaren ondoren, Lucía Soria FEVASeko komunikazio teknikariak eta Pernan Goñi ilustratzaileak FEVASek egindako eta Eusko Jaurlaritzak finantzatutako “Musika inklusiorako tresna gisa” gida aurkeztu zuten.
Jardunaldiak “Kulturarako eskubidea eta hezkuntza-inklusioa” mahai-inguruarekin jarraitu zuen. Bertan parte hartu zuten Mikel Cañadak (Musika Gela – Euskadiko Orkestra), Simon Ezquiagak (musikaria eta aktorea) eta Ana Belen Garciak (Urnietako Lourdes Iriondo Musika Eskolako zuzendaria). Gune horretan, irakasleei desgaitasunen bat duten ikasleak ikasgeletan eta musika-jardueretan sartzea erraztuko dien materialak eta baliabideak izateko beharra azpimarratu zen.
Amaiera gisa, Nora Filmsek Plena inclusión taldearekin elkarlanean ekoitzitako “Lo imposible se hará” dokumentalaren proiekzioa etorri zen. Dokumentala erakundearen 60. urteurrenaren ondorioz egin da, adimen- eta garapen-desgaitasuna duten artistek Carlos III Orkestrarekin batera emandako kontzertu batean oinarrituta.
