Maiatzaren 28ko hauteskundeen esparruan, FEVASek, bere kide diren 13 erakundeekin (Apnabi-Autismo Bizkaia, Aspace Bizkaia, Aspace Gipuzkoa, Apdema, Atzegi, Donostiako Goyeneche Fundazioa, Usoa Fundazioa, Futubide, Gaude, Gautena, Gertuan Fundazioa, Gorabide eta Uliazpi) lankidetzan, adimen- edo garapen-desgaitasuna duten pertsonen hiru topaketa programatu ditu alderdi politiko nagusietako ordezkariekin.
Topaketak egun hauetan egingo dira:
-Maiatzak 5, Donostiako Kursaalen.
-Maiatzak 9, Bilboko Itsasmuseumean.
-Maiatzak 16, Gasteizko Artium Museoko Auditorioan.
Ekitaldi horietan familia eta profesional batzuek ere hartuko dute parte. Gure elkarte-mugimenduak dei egin die gaur egun Arabako, Bizkaiko eta Gipuzkoako Batzar Nagusietan ordezkaritza duten bost alderdi politikoetako Ahaldun nagusigaiei.
Adimen- edo garapen-desgaitasuna duten pertsonei ikusgaitasuna emateaz gain, FEVASek eztabaida-gunea ireki nahi du topaketa horien bidez, zuzenean eragiten dieten gaietan alderdi bakoitzak dituen lehentasunak zuzenean ezagutzeko eta eskaerak aurkezteko aukera izan dezaten.
Horrela, hezkuntza, kultura, osasuna, enplegua edo irisgarritasuna bezalako arlo heterogeneoetako aldarrikapen bateratuak adosteko, erakunde batzuek agintari politikoei helarazi beharreko mezuetan sakontzeko lantalde espezifikoak antolatu dituzte.
FEVAS elkarte-sarearen iritziz, horrelako ekimenak garrantzitsuak dira adimen- edo garapen-desgaitasuna duten pertsonen autoordezkaritzan aurrera egiten eta pertsona horien inklusioan eta herritartasun osoan urratsak ematen laguntzen dutelako.
