FEVASek, lan-bizitza amaitu eta erretiroa hasten denean gertatzen diren aldaketak jorratzen dituen “Amaitu da gure laneko jarduera. Etapa berria gure bizitzan!” gida kaleratu du irakurketa errazean. Gainera, etapa horri modu positiboan aurre egiteko zenbait orientabide ditu. Argitalpen hau, gure Irakurketa Errazeko Gida Bildumaren 7. zenbakia, prestatzeko, Atzegi, Apdema, Gaude eta Gorabideko autokudeaketa taldeetako arduradunen laguntza izan dugu. Gainera, adimen-desgaitasuna duten Apdemako eta Atzegiko kideek balioztatu dituzte testuak.
Gidak etapa honetan sortzen diren gai garrantzitsuak jorratzen ditu: eguneroko errutinen aldaketak, aldaketa fisikoak, kognitiboak, emozionalak, eta abar. Halaber, bizi-kalitate onari eusteko zenbait gomendio ematen ditu, kontzeptu horren 8 dimentsioak kontuan hartuta: ongizate fisikoa, materiala eta emozionala, harreman pertsonalak, eskubideak, garapen pertsonala, autodeterminazioa eta gizarteratzea.
Argitalpen honen bidez, FEVASek adimen- edo garapen-desgaitasuna duten pertsonen gizarteratzearekin eta bizitza osorako eskubidearekin duen konpromisoa berresten du.
