Joan den astean hasi zen Musikazaleak, Euskadiko Orkestraren ekimena, FEVAS Plena Inclusión Euskadirekin lankidetzan, desgaitasuna duten pertsonen kulturarako eskubidea berresteko. Helburu horrekin, 24 musika-tailer planifikatu dira (Bilbon, Donostian eta Gasteizen), eta horietan FEVASeko kide diren 11 erakundetatik etorritako adimen-desgaitasuna, autismoaren espektroko nahasmenduak edo garun-paralisia duten 40 pertsonak hartuko dute parte.
Mikel Cañadaren (Euskadiko Orkestrako Musika Gelako koordinatzailea) koordinaziopean eta Yamel Romero musikariaren laguntzarekin, proiektuak hiru talde egonkor sortu ditu, lurralde bakoitzean bat. 2024ko urritik 2025eko maiatzera, musika esperimentatuko dute sormena, adierazpena eta komunikazioa garatzeko bide gisa. Proiektua 2025eko ekainean amaituko da, hiru kontzerturekin, eta parte-hartzaileen lana ikusaraziko da bertan.
Proiektuak ONCE Fundazioaren, Musikeneren, Bilboko Juan Crisostomo Arriaga Kontserbatorioaren eta Gasteizko Antzoki Sarearen babesa du, eta estereotipoak gainditzea du helburu, adimen- edo garapen-desgaitasuna duten pertsonen irudi positiboa proiektatuz. Gainera, gizarte-eraldaketa bilatzen du, gizarteratzearekin konpromisoa duten eragileekin aliantza eginez. Horregatik guztiagatik, Musikazaleak, ARTIS+ izenekoaren, gizarteratzeko artearen, barruan ere badago. Azken hori, desgaitasunagatik edo arrazoi sozialengatik bazterketa-arriskuan dauden biztanle-taldeentzako kultura-ekipamenduekiko irisgarritasuna hobetzea helburu duen mugaz gaindiko lankidetzarako proiektu europarra da.
Musikazaleak programak FEVAS Plena inclusión Euskadik Euskadiko Orkestrarekin duela 15 urte baino gehiagotik duen lankidetza indartzen du. Lankidetza hori kontzertuetara eta entseguetara joatean eta kolektibo horientzat berariaz diseinatutako sormen-tailerrak egitean gauzatzen da. Harreman emankor horrek eragina izan du adimen- edo garapen-desgaitasuna duten 1.500 pertsona baino gehiagorengan.
FEVASek modu positiboan baloratzen du adimen-desgaitasuna, autismoaren espektroko nahasmenduak eta garun-paralisia dituzten pertsonek kulturaz gozatzeko duten eskubidean eragiten duen eta gizartean parte hartzeko bide berria irekitzen duen ekimen hau.
