FEVASek agerian utzi du adimen-desgaitasuna duten pertsonei enplegu publikora iristea eragozten dieten oztopoak ezabatzen jarraitu beharra. Legeak % 2ko erreserba eskatzen duen arren, praktikan eskubide hori urratzen jarraitzen da. Egoera hori eragiten duten arrazoien artean hauek nabarmentzen dira: estereotipo faltsuak, hala nola adimen-desgaitasuna duten pertsonak ez direla lan egiteko gai; pertsona horietako gehienentzat, oraingoz, ezinezkoak diren sartzeko baldintzak eta titulazioak; eta irisgarritasun kognitibo falta deialdietan, gai-zerrendetan, probetan eta espazioetan.
Batzuetan, diskriminazio horiei gehitzen zaie adimen-desgaitasuna duten pertsonentzat erreserbatutako plazak, betetzen ez badira, beste kupo edo txanda batzuetara (desgaitasunera edo orokorrera) pasatzen direla, eta, beraz, adimen-desgaitasuna duten pertsonen enplegu publikorako soluzioa atzeratuz doa, sakoneko gaiei heldu gabe.
Testuinguru horretan, FEVASek azpimarratzen duenez, Desgaitasuna duten Pertsonen Eskubideei buruzko NBEren Konbentzioak, desgaitasuna duten pertsonen eskubideei eta haien gizarteratzeari buruzko Lege Orokorrak eta Enplegatu Publikoaren Oinarrizko Estatutuaren Legeak adimen-desgaitasuna duten pertsonen enplegurako eskubidea bermatzen dute.
Adimen- edo garapen-desgaitasunaren Euskadiko elkarte-mugimenduarentzat, enplegu publikoa ez da utopia bat, eta, horregatik, enplegu publiko inklusiboa lortzen benetan lagunduko duten jardunbide hobeak aldarrikatzen ditu.