PSOE eta PP alderdi politikoek lortutako akordioaren ondoren, laster Konstituzioaren 49. artikulua aldatu egingo da, ‘urritu’ terminoaren ordez desgaitasuna duten pertsonak jartzeko. Erreforma horrek amaiera ematen dio CERMIk ordezkatzen dituen desgaitasun-erakundeek aspaldidanik eskatzen zuten errebindikazioari, Desgaitasuna duten Pertsonen Eskubideei buruzko Nazio Batuen Konbentzioaren aginduarekin bat etorriz.
Konstituzioaren 49. artikuluaren testu berriak hau ezarriko du lehen paragrafoan: “Desgaitasunen bat duten pertsonek askatasun- eta berdintasun-baldintza erreal eta eraginkorrez baliatzen dituzte titulu honetan aurreikusitako eskubideak. Legez arautuko da jarduera horretarako beharrezkoa den babes berezia”. Eta bigarren atalean: “Botere publikoek desgaitasunen bat duten pertsonen erabateko autonomia pertsonala eta gizarteratzea bermatuko duten politikak bultzatuko dituzte, erabat irisgarriak izango diren inguruneetan. Era berean, beren erakundeen parte-hartzea sustatuko dute, legeak ezartzen duen moduan. Bereziki, emakumeen eta desgaitasuna duten adingabeen behar espezifikoei erantzungo zaie”.
FEVASen parte den Plena inclusión elkarte-mugimenduarentzat, neurri hori historikoa da bi arrazoirengatik: batetik, desgaitasunen bat duten pertsonak duintzen dituelako, eta, bestetik, politiken eta legediaren garapena aipatzen duten aldaketa garrantzitsuak egiten dituelako, erakundeak eta desgaitasuna duten pertsonak eurak kontuan hartuta.
