Larunbat honetan, irailaren 29an, Vitoria-Gasteizko Arriaga zentro zibikoan egin den ekitaldiak, Apdemako, Atzegiko, Gaudeko eta Gorabideko auto-kudeaketa taldeetako kide diren eta adimen urritasuna duten 96 pertsona bildu zituen. “Jarri iezadazu erraz, uler dezadan. Irisgarritasun kognitiboa” goiburupean, auto-kudeatzaileek irisgarritasun kognitiboari buruzko gogoeta egin zuten, zenbait ingurune ebaluatuz.
Apdemako, ekitaldia antolatzen duen elkarteko auto-kudeatzaile diren Elisa López de Briñasek eta Carlos Ruedak aurkeztu zuten ekitaldia, eta parte hartzaileei hitza eman. Ana Peñacoba Apdemako zuzendariak hitz batzuk zuzendu zizkien auto-kudeaketako Arabako taldeei, euren 20. urteurrena dela eta; eta Valeria García-Landarte FEVASeko zuzendariak, FEVASek irisgarritasun kognitiboaren alde egiten duen apustua konpartitzeko aukera izan zuen. Carlos Ruedak eta Javi Montesek gaiari heldu zioten, irisgarritasun kognitiborako sarrera batekin, FEVASek denbora gutxi barru argitaratuko duen gidaliburua oinarri hartuta.
Kontzeptu batzuk argitu ondoren, partaideak zortzi taldetan banatu ziren, irisgarritasun kognitiboa zortzi ingurunetan aztertzeko: supermerkatuan, tranbiaren geralekuan, autobus geltokian, autobus geltoki intermodalean, zentro zibikoan, kiroldegian, dendan eta hiru banku erakunderen kutxazain automatikoetan. Ebaluatu beharreko elementuen artean hauek zeuden: seinaleak, orientatzeko erraztasuna, oztopo arkitektonikoak, informazioa irakurketa errazean jasotzeko aukera edo arreta eskaini zieten pertsonen “irisgarritasuna”.
Ondorio azpimarragarrienen artean, auto-kudeaketa taldeek irakurketa errazean oso informazio gutxi dagoela oraindik, oztopo fisikoak daudela edo, komun batzuk, ondo seinaleztatuta dauden arren ez daudela ondo egokituta aipatu zuten. Beraien ebaluazioan, tranbiak proba gainditu egiten du irisgarritasun kognitiboari dagokionez, eta kutxazain automatikoak dira arazo gehien sortzen dizkietenak ulertzeko zailtasunak dituztenei.
Beste urte batez, auto-kudeatzaileek modu positiboan baloratzen dute Topaketa, eta une honetan bertan hurrengoan lan egiten hasten dira.
