Eusko Jaurlaritzako Osasun Sailak eta Osakidetzak Lehentasunezko Osasun Txartel Indibiduala (Lehentasunezko OTI) jarri dute abian, adimen- edo garapen-desgaitasuna duten pertsonei zuzendutako ekimena, osasun sisteman arreta hobetzeko helburuarekin.
Neurri hori borondatezkoa da, eta osasun-sistemaren barruan dauden pertsona horiek behar espezifikoak dituzten paziente gisa identifikatu ahal izateko balioko du. Euren egoerarako arreta egokiagoa ematea erraztuko du. Lehentasunezko OTIari esker, irisgarritasuna, laguntza eta arretaren pertsonalizazioa hobetuko dira, une oro pertsona bakoitzari errespetuzko eta egokitutako osasun laguntza bermatuz.
Txartela aurrez aurre eska dezakete Osakidetzako erreferentziazko osasun-zentroetan, interesdunak berak, haren legezko ordezkariak, senideek edo osasun- eta gizarte-arloetako profesionalek.
FEVASen oso positibotzat jotzen dugu neurri hori, gure elkarte mugimenduak Eusko Legebiltzarrari helarazi zion aldarrikapen bati erantzuten baitio. Gure ustez, aurrerapauso nabarmena da osasunerako eskubidea gauzatzeko bidean, eta urrats garrantzitsua herritar guztientzako osasun-sistema inklusiboagoa eta irisgarriagoa lortzeko bidean.
Informazio gehiago HEMEN
