Martxoaren 8a, Emakumearen Eguna, dela eta, Plena Inclusión España erakundeak ikerketa baten emaitzak aurkeztu berri ditu. Ikerketa horretan, adimen- edo garapen-desgaitasuna duten emakumeek sexu- eta ugalketa-eskubideez gozatzeko dituzten zailtasunak identifikatu dira. Azterlan horren ondorioen arabera, emakume horiek diskriminazioa jasaten dute sexu- eta ugalketa-eskubideak eskuratzeari dagokionez, eta datu hauek agerian uzten dute hori:
-% 47ak ez du bikotekiderik.
-Elkarrizketatuen % 83ak ez du sexu-harremanik gaur egun.
-Sexuari buruz gutxi edo batere ez du hitz egiten % 80ak.
-Bestalde, 10etik 6k adierazi du ez dituela aukeratu erabiltzen dituen antisorgailuak.
-Soilik 100 emakumetik 6k dituzte seme-alabak.
500 emakume inguruk emandako informaziotik ateratako zifrek erakusten dute ehuneko handi batek bere eskubideak ezagutzen dituela, eta, horregatik, harrigarria da eskubide horiek erabiltzeko zailtasun handiak izatea. Oztopo hori eragiten duten zergatien artean aurreiritzi sozialak eta familien presioa identifikatzen dira. Horregatik guztiagatik, Plena inclusiónek gizarteari oro har eta, agintari publikoei batez ere, “informazio ulerterraza, egokitua eta eskuragarriagoa eskatzen die, eta laguntza sendoagoa ematea adimen-desgaitasuna duten emakumeei, autonomia handiagoa izan dezaten eta, horrela, beren sexualitatea modu aske eta arduratsuagoan bizi dezaten”.
Ikerketa Madrilgo Unibertsitate Autonomoko talde batek egin du, Emakumeari buruzko Ikasketen Unibertsitate Institutuaren babesarekin, eta Plena inclusiónen “Lideresas para el cambio” programaren barruan dago. Programa horrek Gizarte Eskubideen Ministerioaren eta 2030 Agendaren finantziazioa du.
#Lideresasparaelcambio hashtag horrekin berarekin Plena inclusiónek kanpaina bat abiarazi du sare sozialetan, adimen-desgaitasuna duten emakumeak martxoaren 8ko manifestazioetara joatea sustatzeko.
