Martxoaren 22an Euskalduna Jauregian egindako topaketan, adimen-desgaitasuna, garuneko paralisia eta autismoaren espektroko nahasmenduak dituzten 40 pertsonak baino gehiagok Euskadi inklusiboagorantz aurrera egiteko konpromisoa eskatu diete alderdi politikoei.
Hurrengo hauteskunde-hitzorduaren esparruan, adimen-desgaitasuna, garuneko paralisia eta autismoaren espektroko nahasmenduak dituzten FEVAS Plena Inclusión Euskadi elkarte-mugimenduko pertsonek “Nahi dugun Euskadi inklusiboa” manifestuan jasotako euren aldarrikapenak helarazi dizkiete alderdi politiko nagusiei. Gainera, hurrengo legegintzaldian gauzatu asmo dituzten neurriei buruz galdetu diete politikariei.
Alderdi politikoen izenean, hauek izan dira ekitaldian: Nerea Melgosa, Berdintasun, Justizia eta Gizarte Politiketako sailburua eta EAJ-PNVko Arabako zerrendako bigarrena; Nerea Kortajarena, legebiltzarkidea, EH Bilduko bozeramailea Eusko Legebiltzarrean eta Gipuzkoako zerrendaburua; Ekain Rico, PSE-EEko Politika Autonomiko eta Politika Publikoetako idazkaria eta Bizkaiko zerrendaburua; Arkaitz Gorritxo, Elkarrekin Podemoseko Bizkaiko bigarrena; eta Laura Garrido, Alderdi Popularreko legebiltzarkidea eta talde horretako Osasun idazkariordea.
Adimen- edo garapen-desgaitasuna duten pertsonen ahotsa hauek ordezkatu dute: Carlos Alonsok (Gaude), Enara Martínezek (Gorabide), Najwa Dieguezek (Aspace Bizkaia), Álvaro Fernándezek (Apnabi-Autismo Bizkaia) eta Naia Urrutiak (Gaude). “Nahi dugun Euskadi inklusiboa” manifestua ere beraiek irakurri dute. Dokumentu honek hainbat arlotan hobetzeko neurri zehatzak planteatzen ditu: irisgarritasunean, enpleguan, osasunean, bizimodu independentean, hezkuntzan, garraioan, justizian, kirolean eta kulturan.
Manifestu hau, adimen-desgaitasuna, garuneko paralisia eta autismoaren espektroko nahasmenduak dituzten pertsonen berariazko eskaera batekin amaitzen da. “Gizartearen parte gara eta esparru guztietan parte hartu nahi dugu. Gizarteak ulertu eta balioa eman behar digu”, azaldu dute. Horretarako, herritarren sentsibilizazioa funtsezkoa dela gaineratu dute.
FEVAS Plena Inclusión Euskadik positibotzat jotzen ditu, adimen- edo garapen-desgaitasuna duten pertsonak protagonista dituzten, kolektibo horri ikusgaitasuna ematen dioten eta esparru guztietan, baita politikoan ere, beren burua ordezkatzeko aukera ematen dieten horrelako ekimenak.
