FEVASek eta adimen- edo garapen-desgaitasunaren arloko Bizkaiko sei erakundek modu aktiboan hartzen dute parte Bizkaiko Foru Aldundiak bultzatutako “Adiskidetza Digitalari buruzko 2027ko Plana” izenekoan. Ekimen horren helburua kolektibo jakin batzuei, adimen- edo garapen-desgaitasuna duten pertsonei, besteak beste, ingurune digitaletara iristea zailtzen dizkieten oztopoak identifikatzea da. Azken helburua da arrakala digitala murrizten lagunduko duten neurriak bultzatzea, aukera berdintasuna sustatzea eta gizarte inklusiboagorantz aurrera egitea.
Proiektua, Aspace Bizkaia, Apnabi Autismo Bizkaia, Gaude, Gorabide, Futubide eta Lantegi Batuakeko adimen-desgaitasuna, garun paralisia edo autismoa duten 11 pertsonak parte hartzen duten aurrez aurreko bi saioren bidez gauzatzen da. Horiek guztiek tresna digitalen erabileran izandako esperientziak partekatzen dituzte, baita euren bizipenak eta hobetzeko proposamenak ere.
Lehenengo saioa maiatzaren 23an izan zen, Bilboko BAT Dorrean. Bertan, parte-hartzaileen esperientzia digitalei buruzko hausnarketa egin zen, ardatza haien zailtasunekin enpatizatzean jarriz. Ideia hauek nabarmendu zituzten, besteak beste: webguneetan eta aplikazioetan lengoaia argia eta erraza erabiltzeko beharra, laguntzako audioak sartzea, segurtasuna bermatzea eta nabigazioa zaildu dezaketen elementu emergenteak saihestea.
Hurrengo saioa ekainaren 6an izango da, eta etorkizuneko teknologia nolakoa izatea nahi duten irudikatzera egongo da bideratuta. Parte-hartzaileek pertsona guztientzako ingurune digital irisgarriagoak, inklusiboagoak eta lagunkoiagoak sortzen lagunduko duten soluzioak proposatuko dituzte.
Gure erakundeetatik pozik hartzen dugu desgaitasuna duten pertsonak zuzenean eragiten dieten soluzioen diseinuan protagonista aktiboak izateko aukera hori.
