Zortzi hilabeteko lanaren ondoren, Musikazaleak proiektua amaitu da. Euskadiko Orkestrak (Musika Gela) FEVASekin lankidetzan bultzatuta, Musikazaleak proiektuak 24 musika tailer eskaini ditu adimen-desgaitasuna, garuneko paralisia eta autismoaren espektroko nahasmenduak dituzten helduentzat, Bilbon, Donostian eta Gasteizen. FEVASek positibotzat jo du kultura inklusibo eta parte-hartzailearen bidez eraldaketa soziala sustatzeko helburua izan duen lehen edizio hori.
Proiektua gauzatu bitartean, 2024ko urritik 2025eko maiatzera, FEVASeko kide diren 11 erakundetatik etorritako 43 pertsonak hartu dute parte: Apnabi-Autismo Bizkaia, Aspace Bizkaia, Aspace Gipuzkoa, Atzegi, Goyeneche Fundazioa, Usoa Fundazioa, Futubide, Gaude, Gautena, Gorabide eta Uliazpi. Musika adierazpenerako, garapen pertsonalerako eta gozamen kolektiborako tresna gisa erabili da, desgaitasuna duten pertsonen kulturarako eskubidea berretsiz.
Jarduera ekainean amaitu da, Bilboko Juan Crisostomo de Arriaga Kontserbatorioan (ekainak 5), Euskadiko Orkestraren Donostiako egoitzan (ekainak 11) eta Gasteizko Federico García Lorca Antzokian (ekainak 13) izan diren jende guztiarentzako hiru entzunaldirekin. 500 pertsona baino gehiago bertaratu ziren tailerretan egindako lana erakutsi zuten aurkezpenetara.
Jasotako testigantzek esperientzia horren balioa islatzen dute. Najwa Dieguez (Aspace Bizkaia) parte-hartzaileetako batek, hau adierazi du: «Niri gustatuko litzaidake tailer honetan parte hartzen jarraitzea, bete egiten nauelako eta inoiz egin ezin izango nituzkeela uste nuen gauzak egin ditzakedala sentiarazten didalako, hala nola abestea eta eszenatoki batean musika-tresnak jotzea». Bestalde, Asier Pérezek (Gaude) hau nabarmendu du: «Gehien gustatzen zaidana hainbat elkartetako pertsonekin partekatu ahal izatea da».
Proiektua Mikel Cañada Euskadiko Orkestrako Musika Gelako arduradunak koordinatu du, eta Yamel Romero Musikanaiz Zentroko zuzendariak gidatu du. Musikari horren hitzetan: «Pertsonek askatasunez adierazteko espazio bat sortzea ate bat irekitzea bezalakoa da: dena modu naturalean loratzen hasten da. Harritzen nau nola, leku bat emanez soilik, artea indarrez azaleratzen den».
Musikazaleak proiektuak ONCE Fundazioaren, Musikeneko Bitartekaritza, Kudeaketa eta Hedapen Musikaleko Masterraren eta irisgarritasun kulturalarekin duten konpromisoa erakutsiz, tailerrak egiteko espazioak eta instalazioak utzi dituzten Juan Crisostomo de Arriaga Kontserbatorioaren eta Gasteizko Antzoki Sarearen laguntza izan du.
Gainera, ARTIS+ (gizarteratzeko artea) proiektu europarraren, bazterketa-arriskuan dauden kolektiboentzako kultura-espazioetarako irisgarritasuna hobetzea sustatzen duen lankidetza-ekimenaren parte da.
Programa horren bidez, FEVASek eta Euskadiko Orkestrak kultur jarduera inklusiboen garapenean oinarritutako 15 urte baino gehiagoko lankidetza indartu dute. Horri esker, 1.500 pertsonak baino gehiagok kultura irisgarriago eta parte-hartzaileagorantz aurrera eginez parte hartu ahal izan dute.
