FEVAS Plena inclusión Euskadik, adimen-desgaitasuna, garuneko paralisia eta autismoaren espektroko nahasmenduak dituzten pertsonen eta haien familien eskubideak bermatuko dituzten politikak diseinatzen eta hedatzen modu aktiboan laguntzeko Administrazio publikoarekin harreman jarraitua izateko beharra nabarmendu du.
Testuinguru horretan, joan den ostegunean, urtarrilak 29, FEVASeko ordezkariak eta Eusko Jaurlaritzako Ongizate, Gazteria eta Erronka Demografikoko Saileko arduradunak elkartu ziren. Bertan izan ziren Nerea Melgosa Saileko sailburua, Ivan Larraza Ongizateko sailburuordea eta Iciar de la Peña Hirugarren Sektorea Sustatzeko eta Gizarte Ekintzako zuzendaria. FEVASen izenean, Josean Idoeta presidentea, Valeria García-Landarte zuzendaria, Txema Franco Gorabideko zuzendaria eta Amaia Lopetegui Gautenako zuzendaria izan ziren.
Topaketan, FEVASek elkarte-mugimenduarentzat estrategikoak diren hainbat gai azaldu zituen, besteak beste:
- Eredu publiko-soziala sendotzeko beharra, elkarrizketa zibila indartuz, gizarte-politiken diseinuan, garapenean eta ebaluazioan administrazio publikoen eta elkarte-mugimenduaren arteko lankidetzarako funtsezko tresna gisa.
- FEVASek familien mugimendu gisa duen zeregina, adimen-desgaitasunaren elkarte-mugimenduaren ibilbideari eta sendotasunari balioa emanez, gizarte-ongizateko euskal sistemaren barruan eragile berezi eta beharrezko gisa.
- Familiei laguntzeko zerbitzuak bultzatzearen eta indartzearen garrantzia, beraien ongizaterako, zaintzarako eta bizi kalitaterako funtsezko elementu gisa aitortuz.
- Gizarte-politiken koherentzia eta harmonizazio handiagorantz aurrera egitearen komenigarritasuna, batez ere gizarte-zerbitzuen sistemaren eta bizimodu independentearen ereduaren artean, desgaitasunen bat duten pertsonen eskubideen ikuspegiarekiko koherentzia bermatuz.
- Adimen-desgaitasuna duten pertsonek eta haien familiek euren bizi-ibilbidearekin erlazionatutako erabakiak hartzean modu aktiboan parte hartzearen aldeko apustua, pertsonarengan oinarritutako ereduaren funtsezko printzipio gisa.
FEVASen ustez, bilera horiek bereziki garrantzitsuak dira, bere lan eredua betidanik Administrazio publikoarekiko lankidetzan oinarritu baita, adimen-desgaitasuna, garuneko paralisia eta autismoaren espektroko nahasmenduak dituzten pertsonen eskubideetan benetako eragin positiboa duten politikak sendotzeko biderik eraginkorrena den aldetik.
