Joan den larunbatean, azaroak 18, Autokudeatzaileen XVI. Euskal Topaketa egin zen Bilbon, oraingo honetan Gorabidek antolatuta. Pandemiaren ondorioz hiru urteko geldialdiaren ondoren, berriro ekin zaio eztabaidarako eta hausnarketarako gune horri. Bertan, Apdema, Atzegi, Gaude eta Gorabideko autokudeaketa taldeetako kideak diren adimen desgaitasuna duten pertsonak, beren intereseko gaien inguruan ari dira lanean. Edizio honetan, eta “Jar iezadazu erraz, uler dezadan” izenburupean, ia 90 lagun bildu dira irisgarritasun kognitiboan sakontzeko.
Ekitaldia Valeria García-Landarteren (FEVASeko zuzendaria), Susana Gorbeñaren (Gorabideko presidentea) eta Montserrat Fernándezen (Gorabideko autokudeatzailea) agurrekin hasi zen eta, ondoren, Carlos Alonsok (Gaude) eta Carlos Ruedak (Apdema) hartu zuten hitza, Desgaitasuna duten Plena inclusióneko Pertsonen Ordezkarien Estatuko Plataforman beren esperientzia azaltzeko. Jardunaldiaren zati hori amaitzeko, Goretti Soroa psikologo eta Euskal Herriko Unibertsitateko ikertzaileak hiri-irisgarritasunari eta -mugikortasunari buruzko azterlana aurkeztu zuen.
Esku-hartze horien ondoren, eztabaida-taldeak sortu ziren, hainbat arlotan irisgarritasun kognitiboa hobetzeko proposamenak zehazteko, hala nola enpleguan, osasunean, bizitza independentean, aisialdian eta kulturan. Topaketa bazkari batekin amaitu zen, eta ondoren hainbat jarduera ludiko egin ziren.
FEVASek positibotzat jo ditu elkarte-mugimenduak adimen desgaitasuna duten pertsonen ahalduntzean eta autoordezkaritzan aurrera egiteko esparru guztietan egiten duen apustuan eragina duten topaketa horiek.