Salamancako Unibertsitateko Komunitatean Integratzeko Unibertsitate Institutuak (INICO) antolatutako Desgaitasuna duten Pertsonei buruzko Nazioarteko XII. Ikerketa Jardunaldi Zientifikoak hartu ditu Salamancak martxoaren 12an, 13an eta 14an. “Gizarte inklusiboaren eraikuntza” izeneko edizio honetan, FEVAS Plena Inclusión gure elkarte-mugimenduko profesionalek hartu dute parte, aurrez aurre zein online formatuan. Foro hau aukera bikaina da esperientzia berritzaileenak ezagutzeko eta partekatzeko, eta pertsona guztientzako gizarte inklusiboagoa eraikitzera bideratutako ereduak eta estrategiak indartzeko.
Jardunaldi horiek, besteak beste, helburu hauek zituzten: Hezkuntzaren, gizarte-zerbitzuen eta osasunaren arloan lan egiten eta ikertzen duten profesionalei irekitako diziplina anitzeko topagune eta eztabaida-foroa eskaintzea; Desgaitasunaren arloko ezagutza zientifikoan eta berrikuntzetan egindako aurrerapenak zabaltzea; eta Ikerketa zorrotzaren eta ebidentzietan oinarritutako jardunbide profesional eta antolakuntzakoen garapena eta transferentzia sustatzea.
Landutako funtsezko gaiak
Ekitaldi horretan, hainbat erakundek euren ikerketak aurkeztu dituzte, eta euren ekimen berritzaileenak azaldu dituzte funtsezko eremu hauetan: irisgarritasun unibertsala; zahartze aktiboa; hezkuntza, lan eta gizarte inklusiorako estrategiak; etika eta erantzukizun profesionala; erakundearen kudeaketa eta errendimendua; eta zentroetako eta zerbitzuetako laguntza sistemak. Ezagutza partekatu zuten erakundeen artean, APNABI Autismo Bizkaiak “APNABIn zahartzeari eta autismoari buruzko ezagutza sortzen: berrikuspen bat (2018-2024)” posterra aurkeztu zuen, eta Gipuzkoako Autismo-Gautena elkarteak, bi esku-hartze izan zituen: “Jokabideari laguntzeko plan positiboen ebaluazioa ikasgela egonkorretan” eta “Profesionalen zeregina laguntzak ematean”.
FEVASek jardunaldi horietan parte hartu ohi du, funtsezko espaziotzat jotzen baititu desgaitasunaren arloko azken aurrerapenak ezagutzeko, beste erakunde batzuekin esperientziak partekatzeko eta arreta eta antolaketa eredu hobeak ezartzen aurrera egiten laguntzen duten gai garrantzitsuei buruz hausnartzeko.
Argazkia: INICO
