Sozietate publikoak egin duen dokumentua hainbat erakunderekin (FEVAS, Aspace Bizkaia, Apnabi-Autismo Bizkaia eta Gorabide, besteak beste) izandako elkarrizketan gauzatu den prozesuaren emaitza da.
Susana Garcia Chueca Mugikortasun Jasangarriko sailburuak eta Javier Seoane Euskotreneko zuzendari nagusiak txosten horretan jasotzen diren 44 hobekuntza-proposamenak partekatu dituzte asteazken honetan FEVASekin eta desgaitasunaren inguruko beste erakunde batzuekin. Neurri horien artean daude, besteak beste, webgunearen egokitzapena, Euskotreneko plantillari prestakuntza espezifikoak ematea, egungo piktogramen ordez tamaina handiagoko beste batzuk jartzea eta saltzeko makina berriak instalatzea edo lehendik daudenak desgaitasunen bat duten pertsonen beharrizanetara egokitzea.
Txosten hori egiteko, Euskotrenek lankidetza estua izan zuen desgaitasunaren inguruko erakundeekin, gure elkarte-mugimenduarekin, besteak beste. Bertan, diagnostikoa, adimen-desgaitasuna, autismoaren espektroko arazoak eta garun-paralisia duten pertsonek egunero dituzten zailtasunak eta hobetu beharreko arloak partekatu genituen.
FEVASen iritziz, adimen- edo garapen-desgaitasuna duten pertsonak barne hartzen dituzten lankidetza-prozesu horiek funtsezkoak dira kolektiboari ikusgaitasuna emateko, haien parte-hartzea sustatzeko eta haien eskubideetan aurrera egiteko.
