Idazkiak, joan den urtearen amaieran Bilbon egin zen eta adimen-desgaitasuna duten Apdema, Atzegi, Gautena eta Gorabideko 90 pertsona inguruk parte hartu zuten autokudeatzaileen XVI. Euskal Topaketaren ondorioak jasotzen ditu. Dokumentu horren helburua, sarreran jasotzen den bezala, “irisgarritasun kognitiboaren inguruan gizartea sentsibilizatzeko tresna izatea da”. Gainera, adimen-desgaitasuna duten pertsonak, askotan, erakundeentzat ikusezinak direla azaltzen du, eta horren aurrean laguntza eskatzen du.
Dokumentuak bost arlotan (enplegua, osasuna, bizimodu independentea, denbora librea eta irakurketa errazaren hedapena) hobetzeko ideiak proposatzen ditu, eta zenbait kolektibo profesionalei egiten die zuzenean dei, besteak beste, osasun-langileei, etxebizitzetako begiraleei eta garraio publikoko edo komunikabideetako arduradunei.
“Aldaketa txikiekin, gure eta pertsona askoren bizitza-kalitatea hobetu egingo da”, adierazi dute adimen- edo garapen-desgaitasuna dutenek, eta pertsona horiek kontuan gehiago hartzeko beharra azpimarratu dute.
Ikusi dokumentua hemen.
