Hirugarren Sektorearen eta Gipuzkoako Foru Aldundiaren arteko elkarrizketarako eta lankidetzarako foro berri horrek foru erakundearen planak eta programak egitean Hirugarren Sektorearen parte-hartzea sustatu eta egituratu nahi du. Aldundiko ordezkariek, EUDELek eta hirugarren sektoreko erakundeen 17 sarek hartzen dute parte bertan, horien artean gure erakundeak.
Uztailaren 4an Donostian eginiko lehenbiziko topaketan, Zaintza eta Gizarte Politiketako Sailak datozen bi urteetarako taxutu duen ibilbide-orriaren zirriborroa aurkeztu zen, baita Gipuzkoako boluntariotzako erakundeen diagnostikoa eta gizarte-ekimenerako laguntzen deialdi berriaren oinarri arautzaileak ere. Horrez gain, Mahaiaren egitura zehaztu zen. Egitura horrek hauek izango ditu: presidentetza bat eta presidenteordetza bat, Aldundia (Zaintza eta Gizarte Politiketako Saila, eta Herritarren Partaidetzaren bidezko Gobernantza) eta EUDEL ordezkatuko dituzten lau kide; hirugarren sektoreko sare bakoitzeko kide bat; eta sareko kide ez diren hirugarren sektore sozialeko elkarteak eta erakundeak ordezkatuko dituzten bi kide eta idazkaritza bat.
FEVASek beti egin du lan aliantzak eraikitzen, eta, horregatik, positibotzat jotzen du Gipuzkoako Elkarrizketa Zibilerako Mahaiaren sorrera, administrazioarekin hitz egiteko organo gisa. Hori funtsezkoa izango da politika publikoen diseinuan eta betearazpenean eragina izango duten eta gobernantzan oinarrituko diren akordioak eraikitzeko eta hirugarren sektorea bera indartzeko.
Argazkia: Gipuzkoako Foru Aldundiaren webgunea
