Joan den azaroaren 23an, larunbatean, egindako Autokudeatzaileen XVII. Euskal Topaketan adimen desgaitasuna duten Atzegi, Apdema, Gaude eta Gorabide elkarteetako ia ehun pertsona bildu ziren Donostiako Elizbarrutiko Apaiztegian etorkizuna nola irudikatzen duten hausnartzeko.
Oraingoan Atzegik antolatu duen topaketaren aurkezpenean hauek aritu ziren: Arantxa Triñanes, Eneko Sagarmendi eta Iraitz Huegun erakunde anfitrioiko autokudeatzaileen izenean; Mitxel Lakuntza Atzegiko zuzendaria; eta Valeria García-Landarte FEVASeko zuzendaria.
Ondoren, parte-hartzaileak hainbat eztabaida-taldetan banatu ziren, etorkizuna gai nagusitzat hartuta, eta bertan hausnarketarako hainbat gai planteatu ziren. Nola imajinatzen duzu zure erretiroa? Non uste duzu biziko zarela bost urte barru? Etorkizunean mundua hobea izango dela uste duzu? Zein eragin izango du gugan klima-aldaketak? Eta aurrerapen teknologikoek?, mahai gainean jarritako galderetako batzuk baino ez dira.
FEVAS adi egongo da jardunaldi horren ondorioei, eta dokumentu batean jasoko dira; izan ere, Valeria Garcia-Landartek bere hitzaldian azpimarratu zuenez, “etorkizuna guztion eta gaur egingo dugunaren mende egongo da”. Gainera, azpimarratu zuenez, FEVASek lanean jarraituko du etorkizunean adimen- edo garapen-desgaitasuna duten pertsonen bizitza hobea izan dadin, eta pertsona guztientzako eskubide guztiak bete daitezen.
