Prestakuntza hori, Arkauteko Polizia eta Larrialdietako Euskal Akademian sartzen diren Euskal Poliziako agenteentzako ikastaro bateratuaren barruan dago, eta FEVASek koordinatu du. Aspace Bizkaia, Aspace Gipuzkoa, Apnabi-Autismo Bizkaia, Atzegi eta Gautena elkarteek eman dute.
880 agente horiengana iristeko, Akademiak bost talde antolatu zituen (azaroaren 7, 8, 9, 11 eta 14an), eta horiekin helburu hauetan egin dugu lan: adimen- edo garapen-desgaitasuna duten pertsonei laguntzen dieten erakundeak ezagutzea; adimen- edo garapen-desgaitasuna ulertzea; balizko adimen- edo garapen-desgaitasuna dela eta pertsona batek laguntza beharrak dituela nola antzeman jakitea; egoera ezberdinetan nola jokatu jakitea; eta pertsonarekin komunikazio ona bermatzeko orientabideak ematea.
FEVASentzat eta hura osatzen duten erakundeentzat, lankidetza hori aukera bat da Segurtasun Indarrek eta Gorputzek adimen- edo garapen-desgaitasuna duten pertsonei buruz duten ezagutza hobetzeko eta herritar guztien eskubideetan aurrera egiteko.
