FEVASeko ordezkariak Begoña Pedrosa Eusko Jaurlaritzako Hezkuntza sailburuarekin bildu ziren atzo, hezkuntza eredu inklusiboa indartuko duten ekintzetan eta estrategietan sakontzeko. Topaketan, urte honetarako lehenetsi beharreko laneko ardatzak aurkeztu ziren.
Laneko gune horretan, FEVASen aldetik Josean Idoetak (presidentea), Valeria García-Landartek (zuzendari-gerentea) eta hezkuntza-zerbitzuak eskaintzen dituzten lau erakunde kideetako zuzendaritzek hartu zuten parte: Aspace Bizkaia, Aspace Gipuzkoa, Apnabi-Autismo Bizkaia eta Gautena. Sailaren aldetik, Begoña Pedrosa, Lucía Torrealday (Hezkuntza Politiketako sailburuordea) eta Mikel Juaristi (Aniztasunerako eta Inklusiorako zuzendaria) izan ziren.
FEVASek nabarmendu zuen lankidetza hori funtsezko zutabea dela eredu inklusiboa indartzeko eta adimen-desgaitasuna, Autismoaren Espektroko Nahasmenduak eta Garun-paralisia dituzten ikasleen eskubideak bermatzeko. Gainera, bileran, 2025erako laneko zenbait ildo partekatu ziren, besteak beste: araudiaren hedapena, gizartearen sentsibilizazioa, hezkuntza komunitatearen prestakuntza, familien parte hartzea eta eragileen arteko koordinazioa.
FEVASek modu positiboan baloratzen ditu elkarrizketarako eta lankidetzarako espazio horiek, funtsezkoak baitira hezkuntza inklusiboagorantz aurrera egiteko eta ikasle guztientzako etorkizuneko aukerak sustatzeko.
Argazkiaren egilea: Eusko Jaurlaritza
