Adimen- edo garapen-desgaitasunaren arloko Bizkaiko sei erakundek, FEVASek koordinatuta, modu aktiboan hartu dute parte Bizkaiko Foru Aldundiak bultzatutako “Adiskidetza Digitalari buruzko 2027ko Plana” izenekoan. Ekimen horren helburua kolektibo jakin batzuei ingurune digitaletara iristea zailtzen dieten oztopoak identifikatzea da, besteak beste, adimen- edo garapen-desgaitasuna duten pertsonei. Azken helburua da arrakala digitala murrizten lagunduko duten neurriak bultzatzea, aukera berdintasuna sustatzea eta gizarte inklusiboagorantz aurrera egitea.
Proiektua, Aspace Bizkaia, Apnabi Autismo Bizkaia, Gaude, Gorabide, Futubide eta Lantegi Batuak erakundeetako adimen-desgaitasuna, garun paralisia eta autismoa duten 11 pertsonak parte hartu duten aurrez aurreko bi saioren bidez gauzatu da. Topaketa horietan, parte-hartzaileek teknologiarekin izan dituzten esperientziak partekatu eta irisgarritasuna, erabilgarritasuna eta segurtasuna hobetzeko proposamenak egin dituzte.
Prozesuan zehar inklusio digitalarekin erlazionatutako hainbat erronka landu dira, hala nola webgune eta aplikazio berriak erabiltzean seguru sentitzeko beharra, teknologia argia eta erraza izatearen garrantzia eta gizarteak, administrazioak eta ingurune hurbilenak tresna digitalen erabilera errazteko bete dezaketen rola.
Parte-hartzaileek egindako proposamenen artean hauek nabarmentzen dira:
- Webgune errazagoen diseinua.
- Irakurketa errazaren erabilera edukien ulermena hobetzeko.
- Prestakuntzaren beharra.
- Tutorial irisgarriak sortzea, gailuak eta aplikazioak nola erabili urratsez urrats azaltzeko.
- Nahasmena edo segurtasunik eza sortzen duten elementuak kentzea.
Parte-hartzaileak pozik agertu dira esperientzia horrekin euren ideiak azaltzeko eta hausnarketak egiteko espazioa izan dutelako. Era berean, ekimen horretan parte hartzen dugun erakundeok aintzat hartzen dugu haien ekarpena, eta pertsona guztientzako ingurune digital inklusiboagoa eta lagunkoiagoa eraikitzen modu aktiboan laguntzeko aukera hau txalotzen dugu.
